囍雲軒

Open Now

Now Closed

元朗形點都有唔小食肆，不過最近都開咗一間新酒樓，今日同屋企人去試吓飲下午茶。呢度暫時唔可以網上攞飛排隊，2點鐘嚟到，外邊排隊嘅人人山人海，撳咗飛等位，卒之要成30分鐘先有位，因為個場都幾大，所以都唔算排得耐。👍睇返張點心紙，選擇都好多，另外仲有下午茶特價點心，咁我哋就乜都叫啲，試吓嗰啲點心水準得唔得。😁先嚟碟蘿蔔糕，煎得好熱，不過唔係好夠香，唔係好削，可以一試。值得一提嘅就係，佢嘅甜醬辣醬味道都唔錯，雖然唔係余均益。跟住嚟咗碟鮮果雲吞盞，呢個幾特別，唔係度度都有得食，雲吞皮炸咗做個盞，上邊放咗啲雜果沙律，效果唔錯。👍👍跟住嚟咗碟川味豬手，係白雲豬手再加啲川味麻辣汁，略嫌佢唔係好入味，不過好腍。叉燒包同鮮蝦菜苗餃兩樣都正正常常。另外叫咗碟肉片炒河，炒得都算幾乾身，肉片都有醃過，唔太韌，河粉唔太油。👌大廳有個大螢光幕，影住個鬍鬚師傅喺度做點心，不過唔知係唔係每樣都係經佢手做出嚟😜。整體嚟講，呢間酒樓嘅裝修同食物質素都唔錯，價錢亦都唔算太高，可以接受。👍