餐廳位於赫德道既地舖，樓高兩層。地面街舖主打happy hour想飲返兩杯既朋友，而樓上就係俾用餐同埋包場開party等等之用。雖然為處鬧市，但包場K房平日收費都只係$3000左右，就算周末時都係$5-8千蚊不等，咁既價錢可以坐到廿幾三十人都算合理啦！
香煎北海道鮮帶子沙律配青檸油醋汁 ($148)：煎到火喉剛剛好既帶子非常鮮味，能夠做到表面香口之餘卻仍然食到僅餘既海水味，撈埋沙律上面既青檸油醋汁一齊食真係非常開胃、清新醒神！
法式龍蝦湯 ($68)：龍蝦湯整體感覺唔錯，特別鍾意佢裹面既材料令到湯能夠有點咬感，配埋附送既蒜蓉飽一齊食剛好可以中和返湯既鹹味，值得推介作為主菜之前既點綴之選！
焗原隻龍蝦米多配燒粟米，薯條及韓式泡菜 ($368)：龍蝦方面真係原隻開邊上，喺size方面真係「冇呃人」！龍蝦首先起晒D肉，之後再將D肉撈埋燈籠椒同埋蘑菇再擺返落個蝦殻到同芝士一齊去焗，超正！配菜方面，最突出既係燒粟米，非常香口得黎之餘又唔駛擔心太熱氣，反而韓式泡菜配埋龍蝦度既感覺總係有少少格格不入咁。特別值得一提既係龍蝦上面棵花係食得架！
香燒西班牙黑毛豬肋骨配芝士酸辣汁 ($168)：豬肋骨醃得十分入味，能夠做到帶少少BBQ既感覺之餘又有少少酸甜既味道，配埋放喺ribs上面既芝士一齊一啖食落口真係一流！不過，如果肉質方面可以做到更加腍滑，令到D ribs唔駛用咁多力就可以「骨肉分離」的話就更加好喇！
總括黎講，呢度既「性價比」喺尖沙咀鬧市實在非常合理。特別值得一齊既係呢度既服務態度，經常加水唔在講，每道菜上枱時更加會同你簡單介紹食材既煮調技巧同埋最佳食用方法，細心既程度真係喺現今既香港買少見少。如果我有機會開party的話一定會考慮呢個咁就腳、又價錢合理既地方！
