來多碗車仔麵 (路德圍) (Closed)

睇完五月天演唱會，當然係要搵地方醫肚仔，由於時間比較夜，揀左比較多野食嘅荃灣，打算食碗粉麵就番歸。路德圍多野食眾所周知，除左車仔麵，仲有上海麵、米線，非常苦惱。見呢間來多碗有條小人龍，即管一試。事前睇左少量評價，我大概知道好評佔大多數嘅原因。下單形式自助，好似傳統車仔麵般，透過玻璃可以見到有咩配料，點菜埋單，自行搵位。店內位置唔多，快食快走。配料接近40款，好似丸、餃、雞翼、滷水、牛腩、魷魚等基本選擇，淨餸定價$8-14；跟麵唔同計法，例如3餸麵定價$36、4餸$43，如此類推。可配粗、幼、油、河、米、麵、瀨粉，比較特別有菠菜麵。雞翼、甜心蘿蔔、辣魷魚幼麵、秘製辣汁 $36滷水豆卜、豬腸、豬紅河粉 $36就咁睇價錢又唔係好貴，但配料份量偏少。雞翼兩隻、蘿蔔豆卜三件、豬腸少到幾乎睇唔到。豬紅唔夠滑；雞翼唔入味，肉偏乾；魷魚非常普通。豆卜你見到啦，黑色一舊唔知想點，亦唔覺有滷味。蘿蔔算係最好，起碼冇渣。麵嘅份量可以，河粉好散。但最失望係秘製辣汁，冇特色冇料到，同普通餐廳提供炒過嘅辣醬冇分別