先前喺旺角食過吞pot， 今次行完街就到尖沙咀呢間舖頭度食，其實食物嘅質素都係一樣咁好，冇話邊一間有大分別。 入到去店員安排咗近窗邊嘅位好大個落地玻璃對住夜景, 店員特登幫我哋校細啲個冷氣驚我哋凍親。
兩個人食咗五百幾蚊叫咗個螺片湯底。
叫咗個自家製嘅芝士炸響鈴， 好味但唔健康嘢食，我哋都要忍下口嗌咗細份，過囗瘾。
叫咗一份雪花牛肋片， 雖然牛肋片脂肪冇咁多, 但係烚熟之後亦都唔會硬到好似擦子膠咁樣。
再叫多咗一份餃餃震， 呢個上次都有食過， 今次再叫係因為佢 八粒餃裏面有四款味道， 兩個人打邊爐又唔食得咁多嘢食但每款都想試下， 叫呢個餃餃震就非常之適合。
之後叫咗一杯大杯鹹檸七， 兩個人嘅打邊爐就咁樣完結啦。 走嘅時候起poster 見到 星期六日公眾假午餐係有半價優惠㗎， 打邊爐要慢慢打先過癮，星期六日有呢個半價優惠就可以一家大細過嚟一齊食。
