大丸和風食堂 (Closed)

前幾日收工去咗旺角交收，果陣仲要落大雨，拿拿聲入咗旺角通菜街諗住求其入一間日本餐廳食晚餐，見到呢間大丸裝潢好吸引，估唔到野食都有驚喜。佢呢度食物選擇非常之多，有壽司刺身、有串燒、有拉麵烏冬、有壽喜燒，仲有酒飲！兩個人食咗大概三百幾蚊，樣樣都大份夾抵食，量大之餘質素唔差，性價比高，可以話係平民居酒屋之選！三文魚腩刺身(4片)HK$68、壽司三文魚腩刺身比想像中更加厚同大塊，色澤都靚同食落油脂充足！壽司都係即整，上碟時紫菜仲脆卜卜，正！辛辣黑豚肉拉麵 HK$70拉麵嘅口感彈牙，叉燒的份量十分慷慨，有3大塊，每一塊都燒得香口入味。湯頭微辣令人胃口大開，仲有好多配菜例如有完整一個嘅唐心蛋，唔錯咖哩雞扒飯 HK$68咖哩雞扒飯嘅份量又係大大份！雞件大大件，嫩滑口感，濃郁咖哩加上大量配菜，係下飯之選。另外，大丸啲野飲都好有特式，我點左一杯Matcha Latte，個人認為多奶左少少，可以同佢講番少奶。仔仔點左杯巨峰梳打，都係好飲的！三百幾蚊食到棒住肚走，鋪頭寬敞又多卡位坐得舒服。收工食飯都係一個唔錯嘅選擇。