月軒廚房 (Closed)

今晚即興約朋友到銅鑼灣至灣仔一帶晚飯，沒有任何菜色要求，於是採取「行到邊食到邊」的心態「搵食」，路經灣仔天樂廣場見到間叫「月軒Le Crest」的廣東酒樓，於是就抱住「試新嘢」的心態去幫襯。。。叫左「招牌炸子雞」、「海參北菇鵝掌煲」、「杏汁燉白肺湯」一客、「北芪黨參圓肉燉山瑞湯」一客，宇治金時燕窩布甸，最後仲送左個綠豆沙潻。。兩個人叫左半隻「炸子雞」，隻雞唔算太大，皮脆肉嫩味道幾好，連淮鹽都唔駛點嚟調味。海參北菇鵝掌煲- 海參同鵝掌都炆得夠「淋」，獻汁夠晒味道，我仲畧嫌濃左D，我個朋友就好欣賞，仲「爬」左兩碗飯。兩客湯份量一般，味道都ok，都叫做足料，係杏汁白肺湯的杏汁味少左D，但係對於我呢個唔係好鍾意「杏仁味」但係好鐘意白肺湯的人就啱啱好。至於甜品，送的綠豆沙味道一般，另外order 的「宇治金時燕窩布甸」就好正，紅豆甜味恰到好處，以為淡綠色的綠茶布甸味道實「淡茂茂」，但係又唔係喎，淡綠色的布甸滲出清香又唔係太甜的綠茶味，ok喎！其實見呢間酒樓門面同裝修咁平實都無乜期望，但是今晚食完之後又覺得ok喎！會再嚟幫襯！😊😊