Golden Bowl

平安夜1點就收工，平日甚少食飯嘅我忽然想食麻甩飯，特別係好耐都冇食嘅椒鹽豬扒飯炒底！前一日已上網睇邊間好食，原本想食同事推介深水埗個間合興旺茶餐廳，可惜逢周二休息，最後揀咗牛頭角嘅金飯館。

原來椒鹽豬扒飯得牛頭角店先有，旺角分店係冇嘅，千奇唔好去錯！大約點半左右去到，唔算多人，叫咗個椒鹽豬扒飯炒底，即炒即炸嘅話都算好快上菜！第一眼見到鑊氣十足同份量充足，豬扒連飯堆到滿滿，旁邊有啲炒椰菜，豬扒上面堆咗滿滿嘅類似避風塘嘅炸蒜粒同辣椒粒，外觀好靚仔！

第一啖食咗啖炒飯先，飯粒分明，好香口，豬扒都好鬆脆易咬，鍾意食飯上面嘅蒜粒，好好送飯，不過我嫌唔夠辣，問吓有冇辣椒油，但店員話呢度冇呢啲？？辣椒油都冇算有點奇怪，而朋友話一碟椒鹽豬扒飯炒底$78不包飲品好貴喎，但我又覺得以咁嘅份量同賣相，都算物超所值！

椒鹽豬扒飯炒底

$78

熱檸水

$6

2