Video
Read full review
2012-05-02
139 views
收到席前facebook fanpage講話4月27號會試業，因為當日有事去唔到，結果改左今日先去!今日同好鍾意食席前o既女朋友仔走左過去筲箕灣。街上面太多人睇譚公誕飄色巡遊啦，所以行左好耐先行到。一路行就一路望門牌number，終於搵到(應該係)席前啦!!門牌蓋住左紅布，因為佢地暫時都仲未正式重新開業。之前佢地間鋪頭就o係天后，可能因為鋪租問題o卦，而家搬到好遠o既筲箕灣=O=行到o既時候，見到大閘落左一半，裡面冇燈，真係搞到我同女朋友仔好唔開心，因為席前佢地好奇怪，成日都唔講o係門口註明營業時間，所以好多時去到佢地門口先知道佢地落閘，今日冇開門做生意=.=突然，見到有位男士走左入鋪頭，望望下好似席前老闆!我就即刻衝上去問。我： 「你地今日係咪未開門啊?」廚師哥哥： 「我地試業咋，未正式營業」我： 「我之前o係facebook問過你地今日開唔開門架」幾經辛苦，問完之後，廚師哥哥同老闆就嗌我同我女朋友仔入去坐，o個陣先開番燈同冷氣。唔知我同女朋友仔係咪有幸成為佢地新店重新開張o既頭兩位客人呢?o係等食/一路食緊野o個陣同老闆傾左陣計，據老闆所講，席前正式開業日期同營業時間仲未定(但通常
今日同好鍾意食席前o既女朋友仔走左過去筲箕灣。街上面太多人睇譚公誕飄色巡遊啦，所以行左好耐先行到。一路行就一路望門牌number，終於搵到(應該係)席前啦!!
門牌蓋住左紅布，因為佢地暫時都仲未正式重新開業。之前佢地間鋪頭就o係天后，可能因為鋪租問題o卦，而家搬到好遠o既筲箕灣=O=
行到o既時候，見到大閘落左一半，裡面冇燈，真係搞到我同女朋友仔好唔開心，因為席前佢地好奇怪，成日都唔講o係門口註明營業時間，所以好多時去到佢地門口先知道佢地落閘，今日冇開門做生意=.=
突然，見到有位男士走左入鋪頭，望望下好似席前老闆!我就即刻衝上去問。
我： 「你地今日係咪未開門啊?」
廚師哥哥： 「我地試業咋，未正式營業」
我： 「我之前o係facebook問過你地今日開唔開門架」
幾經辛苦，問完之後，廚師哥哥同老闆就嗌我同我女朋友仔入去坐，o個陣先開番燈同冷氣。
唔知我同女朋友仔係咪有幸成為佢地新店重新開張o既頭兩位客人呢?
o係等食/一路食緊野o個陣同老闆傾左陣計，據老闆所講，席前正式開業日期同營業時間仲未定(但通常都係中午開到夜晚)，因為佢地話仲要睇下東大街人流點樣再拍板決定。
入左去，真係同以前感覺好唔同。之前天后o既店鋪係成間都係廚房同擺貨，要食野的話一係就企o係度，一係佢地就會幫手開檯同椅子出黎坐路邊。
我： 「而家都幾好丫，裝修左環境又唔錯，夏天舒服好多!」
老闆： 「但係有D客人就係鍾意坐路邊，貪夠風味呢!」
席前而家除左有椅有檯，又有冷氣，坐得好舒服之外，牆上面都有一D簡約o既牆畫，一種好典型小店o既decoration。廚房前面新增左張吧檯，客人可以坐o係前面睇住廚師整野食，比以前更有新鮮感!至於廚房就通風極佳,就算整串燒同炸野都唔會煙到坐出面o既客人(我諗坐吧檯都應該唔煙到!)，一D都唔會有焗促o既感覺!坐低左之後，影左陣相，就嗌野食，因為我地實在太肚餓啦!老闆同我地講，佢地仲未印好menu，同埋暫時只得八成的貨，其餘兩成貨仲未運到。我地可以叫番以前食開o既野食!
既然我地可以自己發板話事食咩，就梗係食番舊鋪以前我地最鍾意食o既野啦!叫左一人一串豬頸肉，一碟肥牛炒丁，仲有之前o係天后次次都冇貨，食極都食唔到o既燒帆立貝。至於飲野，我地原來想叫珍珠奶茶，不過廚師哥哥話而家唔入珍珠，唔再做珍珠奶茶了，咁我地就只係嗌左凍奶茶。老實講，上菜速度真係唔算高，但o係而家入左鋪，咁良好o既環境等野食，而且食物真係煮得咁出色，等下都係值得o既!
等左大概十零分鐘，終於有野食啦!先講凍奶茶。之前嗌珍珠奶茶，我貪o既唔係佢o既珍珠，係佢o既奶茶。呢種奶茶唔係一般o既港式奶茶，而係台式奶茶!唔係大家一般飲開o既貢茶呀甚麼茶甚麼茶o個隻奶茶可比，佢地真係真材實料，不用奶精，用預先雪好o既紅茶再加入奶，然後好似cocktail咁用個調杯搖勻，再倒落我地最後飲o既飲品杯度，所以一飲落口已經好香茶味，奶味都好突出。同舊時水準不遑多樣!
跟住我地就開動了!先黎o既係燒帆立貝，燒得剛剛好，唔會過火燒韌左，上面有少少調味粉，不過就冇乜特別。十幾蚊一隻唔算好平。跟手黎o既就係肥牛炒出前一丁。其實呢款可以揀轉炒烏冬/炒飯都得架，所以好多款配搭。
當碟肥牛炒丁，一上檯已經聞到好香好鮮o既牛肉味，驟眼望已經同之前食o既唔同。經廚師哥哥介紹，先知道原來佢上星期特登親身去揀、去試同埋買入呢隻新貨。淨係呢份誠意，已經比好多燒肉店/串燒店/連鎖式餐廳優勝得多!相比其他食肆冷冰冰o既服務態度，做完你呢次生意，下次唔返黎幫襯就你o既事o既心態，用心正正就係佢地呢間食店o既宗旨。呢隻牛肉比之前食落o既更濃牛肉香味，側邊o既肥膏比之前少，每一部分o既牛肉都係肉，唔會好似打邊爐咁得三四成係真係肉，而且咬落牛肉已經感受到脂肪已經溶化o係肉入面，就算唔駛好似出面食肆最鍾意落o既鬆肉粉/梳打粉，都食得出佢o個隻嫩滑，比以前食開o個隻肥牛炒丁質感更佳更好味!配上佢地炒丁o既醬汁，加上一向炒完之後碟丁麵表面依然超級少油，價錢都只係同出面食一碟飯相若，但份量真係大大碟，唔會將貨就價，又或者借D倚縮減份量，再加上而家鋪頭有位坐又舒服左，真係超超超抵食!抵我同女朋友成日返轉頭再食呢間席前!
豬頸肉串燒就係我同女朋友仔幫襯席前最鍾意o既食物。豬頸肉本身就係豬o既頸部背後的一個部位，因頸部經常活動，所以豬頸肉特別爽特別好食(情況有點似走地雞)，而每隻豬都只得一小塊豬頸肉，所以豬頸肉更顯矜貴!席前整o既豬頸肉係配上特製醬汁整o既，醃得非常入味，加上豬頸肉本身燒到肉入面帶有油粉，食落帶點油香，真係超超超好味!!!
之後等左陣先黎個芝心多，因為老闆只用人腦記住大家點菜，所以忘記左，好彩提提佢呢個特製芝心多，其實製法有D似西多士，先將兩塊麵包浸滿蛋漿(真的成塊麵包每個位都浸滿!)，然後中間夾著一塊芝士(卡夫?)，再放在炸爐油炸，外香內軟，再o係芝心多外層淋上煉奶，簡直係人間極品!可惜今次o既芝心多稍為炸焦左，否則會更靚更好食!臨埋單前，廚師哥哥特登走過黎，拎左串雞軟骨串燒同雞腿肉串燒請我地食。其實雞軟骨我地都食過，脆下脆下口感好正，至於雞腿肉串燒都係第一次食,咬落去真係勁juicy!雞腿肉本身燒出黎已經好嫩滑，內裡o既肉汁o係咬落去o個下直程想爆發出黎!唔試都唔知原來咁好食!根本唔需要加D咖喱定其他調味料已經咁美味!而佢地每檯客都會送D食物，真係好有人情味!我仲同老闆講星期二會再帶埋朋友返黎幫襯!
食完，同女朋友帶住好滿足o既微笑離開。點解寫呢個食評，係因為好想支持呢D咁有堅持o既小店，希望佢地可以毋懼貴租，繼續屹立o係東大街呢條食街，服務我地呢D咁為食o既普通小市民!唔係執左笠，香港地又會少左D美食架啦!
Other Info. :
我地入左黎無耐，有三位睇完譚公誕飄色巡遊o既中年婦人入黎，老闆同佢地講話試業中，佢地話無所謂。坐低後叫左個肥牛炒烏冬，過左幾分鐘就話整得耐…到個老闆一拎上檯，佢地就話要拎辣椒醬，蓋過食物原汁原味o既鮮味，真係唔識食…不過佢地食左一啖未落醬o既炒烏冬之後都猛讚好食!哈哈，又同女朋友仔成功吸引到其他人幫襯啦!!!
(The above review is the personal opinion of a user which does not represent OpenRice's point of view.)
Post
