一盞燈 (Closed)

近年長沙灣一帶開設不少特色Cafe，年初見開咗呢間睇上去幾闊落同有貓貓嘅Cafe，就決定下午茶時段襯少啲人去試試。店內有個L字型小角落，門內會有幾隻可愛嘅布偶貓嬉戲，據聞會不定時見吓食客，有興趣探吓佢地嘅朋友都可以去幫襯。和風吉列豚肉漢堡配香草薯條 $78漢堡以吉列豚肉配搭生菜同自家製和風沙律醬而成，豚肉經油炸後入口酥脆，沙律醬亦同千島醬味道相似，有開胃解油膩嘅作用。另外配搭香草薯條，整體性價比幾高，適合二人分享。黃金脆炸棒棒雞翼配是拉差辣椒醬 $58單骨雞翼裹上鹹蛋黃同炸，表面起沙感做得極佳，奉桌時香脆熱辣辣，入口即湧出濃厚嘅蛋黃鹹香感，但又未至於過鹹，令人愈食愈上癮。泰式南薑香茅椰香雞肉意粉 $78意粉內有雞柳、蘑菇、香茅同椰香等配料，入口非常creamy惹味，辣度屬於容易無乜後勁嘅程度，連怕辣人士都可以過足口癮。一念一清靜 $58個人認為呢杯飲品名都如店名般充滿禪意，特飲為熱情果配搭烏龍茶，解膩效果一流，茶味甘香幽深，另帶有適當嘅果甜。