壹蒸鍋

Open Now

Now Closed

話說壹蒸鍋係朋友仔們的糧尾聚餐之選，所以今次我地又黎食喇XD 差唔多兩個幾月無黎，估唔到壹蒸鍋都仲係咁多人，好彩一早訂左位，等左一陣就有得入座。老實講，壹蒸鍋的環境係有少少迫，而且有時撞正多人仲會幾嘈，不過呢度真係好在平靚正，二百零蚊就有蒸汽海鮮+火鍋+放題，所以就算佢幾嘈都會黎XD (其實我地又傾計又講笑都好嘈XD)海鮮依然係唔差啦，有帶子、蝦、魚、蜆、蟶子，份量剛剛好每人一件，所以樣樣都試到，個人覺得最好味係帶子，蒸完都唔會縮細或變硬，成個海鮮盤下面仲鋪左一大堆粉絲，加埋蒜茸好惹味。海鮮份量幾大，食完呢轉都已經有少少滿足，細食的朋友可能會有一半飽。之後就叫左刺身，當然就唔係貴價餐廳咁高質素，但入口對得住個價錢，件件厚切無手軟，入口唔會有雪味，每件都夠凍夠鮮味，食過咁多次都無因為唔乾淨而唔舒服。個人推薦甜蝦，隻隻都連頭咁上，唔係一般個D幼身甜蝦，食落甘甜軟綿。跟住都仲叫左唔同火鍋配料打邊爐，肥牛前前後後叫左10碟以上，每次都無漏單，而且碟碟都幾靚仔，肥瘦分佈適中，唔會好多肥膏成口油；魚肉都新鮮，煮兩煮就食得，唔會覺得太多骨。整體黎講性價比仍然保持到，下次糧尾都會再拉大隊黎食。