第一次嚟雅蘭呢間分店
勁開心個樓底勁高 空間感充足
嚟到先發現原來餐廳又有新餐牌推出
每次過嚟食嘢之前留肚是必須的😉
❣️燒福岡芝心漢堡
漢堡扒充滿肉汁 無筋唔韌
有得玩又得食 仲有塊蒜香多士 夠晒脆口
❣️酥皮焗周打魚湯
酥皮烘得好酥脆 一野篤落個湯度食 勁治癒
周打魚湯有濃郁嘅海鮮味
最開心係就算食放題個溫度都熱辣辣
❣️金湯慢煮鮑魚花膠盛
花膠大大塊夠厚身炆到勁腍
鮑魚都煮得夠晒入味 小棠菜就吸收晒兩者嘅鮮味
❣️香煎BlackTiger Prawn拌黑松露忌廉汁
呢個真係不得了 我自己食咗六份
最貼心嘅位係隻虎蝦已經開咗邊
用隻筷子撩出嚟食一啲都唔困難
蝦肉爽口彈牙夠實淨 配埋個黑松露醬更上一層樓
❣️香港仔避風塘瀬尿蝦
冇諗過日式放題店整中式整得咁好食
個避風塘好惹味 夠乾身有鑊氣
瀨尿蝦大大隻 都幾多肉㗎
❣️極尚椰皇燕窩燉蛋白
完全係美顏之選 最鍾意係蛋白微甜
帶椰汁香 食完唔會膩 唔會阻礙食其他嘢嘅進度
❣️葡式香草煮蜆
最鍾意啲香草嘅味道 食落好有葡式風情
蜆肉飽滿 咬落去仲有少少海水味道
❣️上湯翡翠百合螺片
荷蘭豆飽滿爽甜 配上珊瑚蚌糖螺片
係一味炒得好好食嘅菜式
最欣賞個芡汁唔會話好稠
❣️薑蔥爆鱔球
鱔球好厚身 食落啖啖肉 魚皮夠厚身
食到脂肪 係膠原嘅感覺
1
除咗要落單呢啲項目 當然仲有好多甜品飲品小食喺自助區域啦
呢啲相信大家都知道 唔多作介紹啦
