日喜樓 (Closed)

同朋友係銅鑼灣買嘢，行到咁上下有啲肚餓，友人提議試下呢間新開嘅中菜，環境都唔錯。menu 都幾多選擇，由冷盤熱葷，以至甜品都一應俱全。先叫一個推介菜式，四喜臨門小籠包，顏色好別緻，新鮮蒸起，一上檯就出曬煙。入面爆曬汁，但豬肉唔會太肥，味道唔錯。而呢個水煮魚用上桂花魚，魚肉好滑之餘，亦都無骨，對於懶人嚟講真係好正。而且個辣湯好香，魚肉吸收咗湯嘅辣味，但仍然保留鮮味，必試。至於沙窩雲吞雞亦都係滬菜嘅名菜，雞湯呈奶白色，飲落好濃郁嘅雞味，少少似日本嘅雞白湯，而雲吞則係菜肉雲吞，皮唔會太厚，但菜肉餡好多，而侍應仲會幫客人切好啲雞肉，相當貼心。甜品方面就叫咗擂沙湯丸同高力豆沙香蕉，擂沙湯丸非常煙韌，一咬開就爆曬啲芝麻餡，非常香口。高力豆沙香蕉，外皮脹卜卜，一咬開就係唔太甜嘅香蕉同豆沙，甜味適中，不妨一試。