赤橋拉麵係由日本師傅主理嘅拉麵店，喺屯門開店都係唔錯嘅選擇，附近有嘅都係比較連鎖式嘅拉麵店，講到小區經營，可能只會諗到赤橋。
見到佢評語都唔錯，所以都帶住少少期望黎食，更加想像到週末要等位，所以同朋友平日黎。
週五下午時間剛開店，客人都唔少，受歡迎程度可想而知~
店內住置唔多，有二、四人枱，不過聽講話都租左附近嘅鋪位 (?)
旁邊有唔少漫畫書，牆上有唔少手繪畫，令我諗起附近嘅嘆甜品。
有別於「彩」，赤橋拉麵除左有沾麵，仲供應湯拉麵，一共有四款：魚介豚骨、黑油豚骨、海老豚骨、辛肉味噌，定價$78-$85，本身已附海苔、玉子、叉燒、荀。
由於我同朋友係比較鐘意食拉麵，所以都係選拉麵。
辛肉味噌拉麵 $85
一上枱聞到有陣好香嘅芝士粉味，原來面頭加左少量芝士粉，不過食落就唔覺嘅。
先試左一口湯底，湯底夠熱，雖然有少少油，但係可接受程度。
睇落以為幾辣，不過可能係味噌中和左，所以食落就唔係話好辣。
旁邊有唔少辣肉碎~
麵嘅份量都相當多，男士都夠飽。
麵質比較粗身，食落會有少少硬，唔係特別彈牙，但掛湯能力中上
叉燒肥瘦相隔，雖然較薄但肉味突出，我覺得同「彩」食到嘅好相似
玉子外表凹凹凸凸，唔係好光滑
我呢隻比較好彩，流心度不俗。（朋友嗰隻蛋有1/4熟了）不過冇乜蛋味，相對之下，「彩」嘅玉子好好味。
黑油豚骨拉麵 $80
朋友點嘅黑油豚骨拉麵，湯底夠熱，自家製黑蒜油、炸蒜、生蒜蓉味道香濃，稍為蓋過豚骨湯底嘅味道。
湯底冇我嘅辛肉味噌咁油，但朋友都話比較重口味，偏鹹一點。
抹茶可樂 $18
其實喺「彩」都試過抹茶可樂同櫻花可樂，並唔係覺得好飲先點…
而係覺得湯底太有鹹，先點黎解解渴。
整體黎度講，赤橋拉麵嘅質素算係屯門區內不錯，但相對仲有好多更出色嘅拉麵，無需要專程來試，如果喺區內住就一試無妨。
湯底食落較重口味，豚骨味唔濃烈，可能我地期望太高，只係覺得普普通通。
