三橋臺灣牛肉麵館

Open Now

Now Closed

今日放假，約朋友喺屯門慢慢行，掃啲特色小店。夜晚行到置樂花園（惠康超市旁邊），見到呢間「三橋台灣牛肉麵館」，被佢玻璃窗貼嘅透光畫吸引到眼球，～放天燈、行夜市～思鄉之情即刻湧晒出嚟！咁就即刻坐低揀嘢食啦！主食三類（湯麵、拌麵、便當），另外小食、飲品、甜品，總共有超過60種選擇。【秘製特級花枝丸麵】花枝丸大大粒超彈牙，熱焫焫嘅紅燒牛肉湯，濃度適中，唔係普遍嗰種重口味超油超咸湯底。麵條煮得非常煙韌，夠淋又有咬口，一啖湯一啖麵咁夾住食得好舒服！【龍式香煎雞扒乾拌麵】雞扒煎得皮脆肉嫩，每啖咬落去都係juicy嘅！拌麵嘅麵質就煙韌又爽滑，唔會糊埋一團。【台式蒜味燒香腸】最鍾意台式香腸配蒜片，烤得外皮脆卜卜，咬落有肉汁，無可挑剔，呢個係必點小食！【梅香脆炸地瓜條】口感香脆軟糯，甜度酸度剛剛好，一條接一條咁搶食！晚市時間一直見有客嚟買外賣，店員做到冇停手，但我哋等唔使10分鐘就陸續有齊嘢食，估唔到出餐時間會咁快。Menu上面標明係「全天然、無味精、無食粉、無化學」，真係飲完全碗湯都冇口渴嘅感覺，好湯好料可遇不可求。呢間小店食得出係用心做，而且份量頗多，一份主食加小食人均$55左右，性價比相當之高。