Billy Restaurant

閒來無事又上綢搵食，首先吸引到眼球嘅就係「比利常餐」呢個名，用「常餐」做鋪名嘅餐廳經已少見，再配上一個咁常見嘅西人名「比利」，就決定去一探你虛實。

正值新年，街外自然少人，所以等位都唔使，不過餐廳檯與檯設計比較貼，舒適度只係一般。之前經已上網睇過餐廳最推薦嘅就係「焗豬扒飯」，雖然有$30下午茶版嘅「迷你焗豬扒飯」，不過為試下真正實力，梗係試翻$50原版。

2

雜菜湯

$50

配餐附上餐飽及餐湯，餐飽無乜特別，至少一定唔係隔夜，而且有翻至微熱，算係咁㗎啦。反而雜菜湯有小驚喜，用料幾足，而且無乜味精感，湯料亦都幾好食。

2

焗豬扒飯

$50

因為焗豬扒飯係即叫即整，所以食完前菜就差唔多出爐，算係值得一讚，至少我唔洗放個飯攤凍等我飲完個湯。

講翻個焗飯，賣樣算係幾好，用咗炒飯底，雖然蛋份量較少，亦做唔到「金包銀」效果，不過都食得出蛋香味，可惜未夠乾身。
鋪面嘅茄汁調味唔錯，唔會太酸、唔會太甜、亦唔會太咸，配上鮮茄同西芹、洋蔥幾好，混合無乜落鹽嘅炒飯恰到好處。另外加上芝士焗到微燶拉絲，而且份量幾多，令成個焗飯昇華。
以$50嚟講，我會期望會有一塊較大較厚身嘅豬扒，可惜現實同我心目中仲有一段距離。雖然豬扒較薄身，做唔到原身嘅Juice感，不過調味方味唔錯，而且無Over cook，保持到鮮嫩唔韌，而且仲幫你切好一小塊，方便易食，算係一個小貼心。

整體以$50食到一個有份量（食唒成份都幾飽下），好味又唔錯嘅焗豬，應該都無乜嘢好投訴啦。