放題？M佬最鍾意！
減緊肥嘅A姐話今日星期五要放縱一下，所以我哋就去尖沙咀嘅高麗軒食盡佢啦！
一坐低店員就送上各款泡菜，又新鮮又開胃！
拼盤有青口、扇貝、魷魚、魚柳、海蝦等！款款都夠晒新鮮，其中首推扇貝，除咗夠晒新鮮彈牙，最吸引都係上面嘅蒜蓉汁，同隻扇貝好match呀！至於次推魚柳厚切又夠嫩滑，無骨又唔腥。而海蝦有成隻手掌咁大，肉質彈牙，仲有唔少膏。
粒粒都豐滿，漲卜卜，望到都覺得好吸引！燒好咗嘅帆立貝外脆內軟，好juicy呀！
除咗海鮮之外，M佬嘅極力推薦！和牛嘅油脂豐富，肉質嫩滑，牛味非常濃郁，以呢個價錢確實超值。
呢個牛排骨就係A姐嘅最愛，佢一個人食咗足足兩碟！佢話呢個同和牛最大嘅分別係個醃料超入味，而且牛肉味比和牛更香！
唔好以為薄切就無口感呀，燒好嘅牛舌一樣好有質感，而且牛味濃郁。無得彈！
燒到半焦微燶嘅豬頸肉相當好味，脆卜卜又夠爽，一啲都唔韌。
一向少食羊，但唔小心叫錯咗就試吓啦。經過醃製嘅羊肉，一啲都唔膻，反而有啲大漠風味。
韓燒燒雞翼就最麻煩，好難燒得熟，但又真係最好味！
除咗各類燒烤，仲有唔少熟食，而呢個蛋伴生牛肉就係呢度招牌菜。牛肉夠晒光澤，將蛋黃、雪梨絲同生蒜絲撈暈嚟食，好fresh呀。加上牛肉無筋，而且牛肉味香濃，怪唔得之係招牌菜啦。
