今次係中午去食captain house。因為預約左12點試食，去到嘅時候仲未開始午市繁忙時間，可以一嘗包店嘅滋味，享受店裡富特色嘅裝潢同闊敞嘅空間感。
今次食左圍繞凍海鮮拼盤同熱船長海鮮拼盤。
先講海鮮刺身冷盤，當中包括有長腳蟹腳、扇貝、蜆、青口、翡翠螺、小龍蝦、虎蝦、紐西蘭藍鮑魚、八爪魚仔、生蠔同埋麵包蟹。
上菜時，如平常冷盤一樣，海鮮底下配有冰底保持溫度，同時有檸檬用作調味以及木條小木板作裝飾，佈置別緻。
整體黎講，共計11樣嘅海鮮全部都好新鮮，係唔加檸檬汁嘅情況下可以食出淡淡海水咸味。
例如蜆、青口、翡翠螺、小龍蝦、生蠔等等當中嘅鮮味表露無遺。
扇貝、長腳蟹腳同麵包蟹嘅味就更係係眾多海鮮中突圍而出，令人不得不將目光放係作地身上😋。
扇貝勁大份、厚肉，鮮味濃厚，非常新鮮，口比較細嘅朋友可能需要費啲力先可以一啖放入口啊。
長腳蟹腳有十足嘅蟹肉味，同一般蟹肉相比，味道會長長流係口腔入面，仲有濃郁海水味。
而麵包蟹令人十分驚喜，係蟹蓋入面藏著唔少蟹膏，大啖大啖放入中，感受到嘅係一陣陣滿足感🤤。
跟住到熱船長海鮮拼盤，今次我地選擇左5樣海鮮包括長腳蟹腳、蝦、扇貝、蜆同埋青口，以檸檬牛油汁煮。
果然，最緊單嘅配搭最好食，一般以為檸檬牛油汁比較普通，但同時亦是熱食海鮮嘅最配搭。
香濃牛油味配以微酸嘅檸檬香味絕對大大地勾起食慾，令你食到停唔到手啊。
如同之前所講，海鮮十分新鮮，幾乎沒有挑剔之處。同為5樣海鮮中較突出嘅長腳蟹腳，將蟹肉同檸檬牛油汁一同吸入，喺口中混埋一齊，蟹肉鮮味與牛油香味交融，頓時成為呢一餐嘅亮點。
係我地落單嘅時候，侍應哥哥為我地推介蒜蓉包配呢個熱盤乃一絕，而佢亦所言非虛。蒜蓉包本身蒜味惹味，外邊脆入面軟，味道已十分好，係食熱盤嘅後期再用蒜蓉包沾上醬汁食，味道更係一絕😋😋😋！
飲品方面，我地就叫左Fruit punch同Orange Squash，味道清新，ok嘅值得一試。
