六合小廚 (Closed)

尖沙咀茶餐廳推介前兩日行去尖沙咀Apple Store買iPhone X Max，買完梗係順便醫下肚啦，但係又唔想去海港城同人迫，見Apple Store附近原來有好多樓上鋪嘅餐廳，見門口有個阿姐派紙仔，d嘢食又好似幾吸引，價錢又唔算太貴，一於上去試吓先。餐廳叫六合小廚，菜式種類好豐富，可謂中西合璧，有傳統港式風味嘅食物例如魚蛋粉,燒味,叉燒飯，亦有好多唔同嘅小菜可以叫，甚至乎連羊腩煲同火鍋都有得order。我哋兩個人最後叫咗三款小菜，分別係咖喱牛腩煲，沙拉排骨，同蒜蓉蒸海蝦。首先上菜嘅就係咖喱牛腩煲，阿姐捧過嚟嗰陣已經聞到香噴噴，咖喱汁熱辣辣好惹味，牛腩又煮得好淋，最正就係啲牛筋，一啲都唔韌！蒜蓉蒸海蝦，呢個平時通常只會去酒樓嗰度先叫，但係朋友話今日想食下，一於試吓依度嘅質素。真係估唔到雖然係茶餐廳風格，但用料同整出嚟嘅質素都拍得住酒樓！值得一讚！沙拉排骨，呢個係我嘅至愛，個甜味整得啱啱好，用嚟送飯簡直一流！最後我哋仲得知原來依度仲有做外賣，雖然餐廳喺中港城呢邊，但原來連The One，美麗華嗰邊都照樣送外賣，我公司就係嗰度附近，下次一於lunch都試吓佢先～!！