R&B (Closed)

因為疫情既關係，好多食肆做唔到晚市，所以今次下午黎到呢間好多網新打卡既餐廳。佢地有個好大既玻璃位，一望出去好似身處森林入面咁，就呢個位都已經令到間餐廳大排長龍。再講講食物質素，今次我地兩個人叫左三樣野，安格斯牛肉雙層芝士漢堡，煙肉忌廉蛋汁意粉同埋黑松露薯條，再加兩杯飲品。先講講黑松露薯條，佢有粗薯條同幼薯選擇，薯條夠熱夠粗，而且都算大條果隻，佢上面有個醬，個醬幾特別，夾落薯條度又幾夾，加上佢黑松露味都夠重，鍾意既朋加可以試試。煙肉忌廉蛋汁意粉，一碟足夠兩個人食，有好重既忌廉味，而且個汁唔係hea,夠哂濃，意粉既軟硬度適中，啲煙肉都好夠味，重點係佢用pan上，感覺再加分，呢個意粉係有啲水準，所以下次都會再叫。安格斯牛肉雙層芝士漢堡，呢個漢堡比想像大，食完之前既野，已經夠夠地，再加埋呢個漢堡，正。佢既漢堡扒燒得岩岩好，唔會太乾同太燶，個包又夠鬆軟，再配埋生菜蕃茄，絕對夠份量。同埋佢會跟埋薯皇，而呢個薯皇好足料，同外面既唔同好多，不過下次可以同薯條二選一，食到要打包。飲品都可以，不過不失。整體黎講，呢間餐廳都算係性價比高，唔算平又唔算貴，加上氣氛唔錯，值得推介。