當我哋坐低嘅時候, 見到餐廳嘅牆上有個牌寫住靚靚先生的承諾, 其實見到嘅時候都覺得有啲驚訝, 點解車仔麵啲咁地道嘅舖頭可以做到咁專業!
佢嘅承諾內容係咁嘅, 第一佢哋依度嘅食物係唔加味精, 第二就係佢哋已經用咗3m過濾器去過濾佢哋用嘅食水, 第三佢哋承諾,佢哋用嘅油係會日日更換嘅而食油係選用加拿大嘅芥花籽油, 而第四就係佢哋係選用一啲冇公害嘅蔬菜! 望到個咁嘅牌, 有啲令我聯想到大公司裏面嗰啲customer service charter! 感覺真係好專業!
因為大家都好肚餓所以叫咗好多嘢食!
因為今次我哋叫得太多嘢食, 我想同大家分享我認為今次用餐最精彩嘅部分, 以下呢就係我今次用餐內容嘅 highlight!
我叫咗嘅車仔麵!:)
我今次點左嘅車仔麵係用左油麵, 加酸麻辣湯底,
佢哋用嘅油麵, 十分之爽口, 而 麻辣湯底唔會太辣或者太麻, 但有少少辣味, 好適合一啲唔係咁食得辣嘅朋友!
紫菜 $9
我想提一提大家叫車仔麵嘅時候, 可以叫紫菜,紫菜擺落湯底裏面, 紫菜會索咗啲湯, 湯嘅味道會入咗啲紫菜, 口感爽口, 又有味道, 感覺好正!
鮮蝦雲吞 $16
呢一度嘅鮮蝦雲吞,皮唔會太林亦都唔會太厚, 個雲吞都算係落足料,入口嘅時候可以清楚地感覺得到鮮蝦帶嚟嘅爽口口感!
海南切雞$13
佢哋依度嘅海南切雞, 雞肉嘅肉質鮮甜, 雞皮幾厚下, 我好鍾意食佢個雞皮我覺得好滑口!
麻辣咖哩魚蛋 $10
咖哩魚蛋煙韌彈牙! 食落口唔會有啲好粉嘅感覺, 同埋擺喺湯底都唔會發脹! 但其實佢唔太辣, 我諗大部分嘅人就算唔食辣都食得入口!
金蒜肉腸 $12
呢一個香腸蒜頭嘅味道都幾明顯下,味道真係有啲似台灣街邊嗰啲香腸! 入口嗰下;個口咁好豐滿, 一條香腸切開一半, 一個份量係啱啱好, 我覺得如果食得太多嘅話會好容易飽!:)
九轉大腸 $16
呢度嘅豬大腸做得唔錯, 大腸洗得幾乾淨下, 冇大腸嘅臭味, 入口彈牙, 容易咀嚼, 食完之後冇話有啲殘渣要吐返出嚟, 鍾意食大腸嘅朋友可以一試!
口水雞中翼 $16
佢哋依度嘅口水雞中翼, 唔會太辣, 口味大眾化, 唔食辣嘅朋友都可以食得落! 雞翼本身幾滑口冇雪藏味!
九轉茄子肉$13
1
呢一個茄仔佢哋做得十分之好, 茄子冇做得太淋, 有少少油, 但入口嘅時候唔會覺得佢太油膩, 而且保持到茄子嘅香味!
順帶一提, 喺依度食嘢如果你個車仔麵 係叫咗三個餸或者以上, 餐廳係會奉送飲品嘅, 有兩款飲品可以畀你揀,山楂洛神花或冬瓜薏米茶, 我自己就揀咗山楂洛神花, 杯嘢飲感覺唔錯,口感清甜帶有山楂未, 唔會好似飲汽水咁甜或者飲到肚脹, 好適合食車仔麵嘅時候飲!
對於素食人士黎講,依間車仔麵仍然有好多選擇。甜酸齋口感脆得黎唔會過甜過酸, 剛剛好, 上面有爆爆珠配搭起來味道好得意。青椒皮蛋青椒味不大, 不過皮蛋軟滑, 所以仍然值得一叫。假如平時食得比較清淡怕太多調味料, 可以叫姬松茸, 香料炒過後, 淡淡菇味但係唔會太油膩.
今次用餐經驗十分之唔錯第一次食到咁專業嘅車仔麵, 餐廳嘅地理優越, 係尖東嘅地舖.行過尖東,應該唔會睇唔到, 餐廳嘅人服務有禮貌,出餐速度都十分之快,唔會要啲客喺度等! 我好享受我叫咗嘅油麵同埋麻辣湯底, 小食亦十分之精緻好食, 行開尖東如果想食車仔麵嘅話, 我諗我會再來呢一間舖!
今次用餐三個人食咗412蚊
