星期二放假，專登約咗爸爸媽媽去尖沙咀星海食點心，回味一下細個時爸爸成日帶我去飲茶嘅時光👨👩👧。一入到星海，感覺好開揚，樓底超高，配埋啲閃令令嘅水晶燈，成個場好光猛舒適✨。最加分係佢哋有個戶外露台，可以望住街景吹下風，同屋企人傾下偈，感覺特別輕鬆。呢度唔限時，可以慢慢坐，而且商場仲有免費泊車，對揸車嘅我哋嚟講真係好方便！🚗 下午茶點心時間由1400至1500，茶芥費用每位$18，坐幾耐都得，好抵讚。
南翔灌湯小籠包 🫶🏻🫶🏻🫶🏻🫶🏻🫶🏻
呢個小籠包真係冇得輸！皮薄到近乎透明，一咬開啲湯汁即刻爆出嚟，非常燙口但又好juicy！肉餡鮮甜得嚟一啲都唔肥膩，充滿肉香，蘸少少醋一齊食，味道層次即刻豐富晒，係用心製作嘅手工點心。
金鉤啤梨咸水角 🫶🏻🫶🏻🫶🏻🫶🏻
造型整到成個啤梨咁，真係好得意🍐！外皮炸得啱啱好，外層香脆，食落又帶點煙韌，口感一流。入面嘅餡料有齊冬菇、豬肉同金鉤蝦米，咸香味十足，份量又夠，唔會淨係得個殼，每一啖都食到足料。
安格斯和牛天鵝酥 🫶🏻🫶🏻🫶🏻🫶🏻🫶🏻
呢個絕對係視覺同味覺嘅享受！隻天鵝造型好優雅🦢，酥皮一層層分明，做得好鬆化。入面嘅安格斯和牛粒充滿牛油香，肉質軟腍，配埋黑椒汁，惹味得嚟又唔會搶走牛味，水準相當高。
芝士奶皇蘿蔔仔 🫶🏻🫶🏻🫶🏻🫶🏻
賣相超級可愛，扮成一條條迷你蘿蔔仔🥕，呃到人！外皮係軟熟嘅包點，入面嘅芝士奶皇餡甜得嚟帶少少咸香，熱辣辣食，個餡仲有啲流心效果，質感好滑溜，小朋友見到實會好開心。
蠔皇原隻十頭鮑魚酥 🫶🏻🫶🏻🫶🏻🫶🏻🫶🏻
一個好體面嘅點心！成隻十頭鮑魚放喺個酥盒上面，鮑魚煮得好腍滑入味，蠔皇汁非常香濃。下面個酥盒牛油味香，索埋啲鮑魚汁一齊食，口感好夾，每一啖都好滿足，物有所值。
星海蝦餃皇 🫶🏻🫶🏻🫶🏻🫶🏻
飲茶點可以冇蝦餃！星海嘅蝦餃皮薄而唔爛，晶瑩剔透，隱約見到入面粉紅色嘅蝦肉。每隻都包住兩三隻爽口大蝦仁🍤，鮮甜彈牙，加埋少少筍絲增加口感，係一道好穩陣嘅選擇。
今次同爸爸媽媽喺星海嘅下午茶體驗真係好唔錯。呢度嘅點心全部都係手工製作，唔單止個樣做得精緻，味道都好有水準。環境闊落舒適，可以慢慢坐慢慢食，同屋企人聚會真係一流。聽職員講，原來星海本身係個星級婚宴場地👰🏻♀️🤵🏻♂️，所以環境咁靚，亦都接受公司包場活動，夠晒體面。見到爸爸媽媽食得咁開心，呢個下午真係過得好有意義，一家人嘅時光最寶貴！💖
