宴 尖沙咀

呢間日式餐廳係樓上，一出lift就見到好日式嘅佈置。裡面裝飾以木為主，有好多日本嘅擺設。燈光比較暗，座位有卡位，亦都有D類似廂房咁嘅位，私隱度幾足，好o岩情侶或者朋友來傾計。一坐低無幾耐，侍應就拎熱毛巾來比我地抹手，又經常走過來幫我地添水，幾貼心嘅服務。我叫左個鰻魚盒子飯定食，配埋蒸蛋、沙律同麵豉湯。鰻魚飯嘅盒幾精緻，感覺呢度嘅擺盤餐具都幾有心思。蒸蛋好滑，裡面有蘑菇同蟹柳絲，幾好味！鰻魚飯嘅水準幾好，鰻魚幾大塊，燒得剛剛好，魚肉好軟滑，配埋上面嘅燒汁，味道幾好食！飯係用珍珠米，粒粒分明，煮得又軟熟。成個定食份量好足，食完非常飽！另外都叫左個日式煎餃子。餃子味道唔錯，煎得幾香脆，裡面嘅肉餡都幾鬆軟，唔會實到一舊舊咁。