2DP (Closed)

放工同fd係尖沙嘴食飯，經過厚福街見到呢間2DP，間餐廳裝修以淺木色為主調行小清新路線，主打新派素食仲有唔少甜品可以選擇，望落去幾吸引，於是我地就決定試下佢d素食菜式。雖然係主打素食，佢menu都有頗多嘅選擇，我地首先揀左2DP推薦嘅南瓜忌廉大麥飯，不過係叫左常規而唔係原個南瓜盅， 因為本身我fd唔多鍾意食南瓜覺得好甜，但見係推薦就試下咁。呢個南瓜忌廉大麥飯賣相不俗，聞落好香南瓜味，但冇我fd擔心咁會太甜，反而南瓜平衡左芝士同忌廉，令你食落去唔會膩，但感覺好creamy，少少蘆筍令個飯更清新，大麥飯則非常有咬口，搭配埋鬆脆嘅炸天使麵，成個texture幾得意。除左大麥飯，我地仲叫左蕃茄自己制水牛芝士薄餅，味道不錯，餅皮比較薄身。我地仲叫左兩個甜品，分別係蜜瓜牛乳刨冰同水蜜桃窩夫拼普洱雪糕。牛乳刨冰十分之綿密，牛奶味都好濃，蜜瓜堆到好似座小山咁，食得好開心。而水蜜桃窩夫嘅份量就比較細，水蜜桃片唔算多，個窩夫整得好脆身，食起黎唔會太甜，普洱雪糕味道幾特別，成個甜品幾滿意。