一坐低伙記就送上椰菜沙律醬等作為迎賓小食，等串燒上菜時無咁單調，唔錯。
凍日本蕃茄配柚子汁：冰凍蕃茄加上柚子醬汁，酸酸甜甜十分清爽，作為前菜夠醒胃。
燒五花腩＆蔥燒牛舌：燒五花腩上邊有黑椒仲有少少韓式梅醬調味，少少辛辣令肥瘦層次分明嘅腩肉更惹味。
牛舌夠厚身所以食落又唔乾鞋，細蔥香味十足，令牛舌更好味。
芝士流心蛋大啡菇：感覺呢道菜都幾考功夫，溫泉蛋半熟之餘啡菇仲保持濕潤，切開熱辣辣又拉絲，賣相加晒分。本身雞蛋無乜味，但配上啡菇同芝士，三種味道混合令味道變得好濃郁又滑溜。灑上少少七味粉風味更佳。
煙肉荔枝卷＆豚肉芝士卷：煙肉平時人人都覺得佢油淋淋，女仔對佢又好抗拒。但入邊夾粒清甜既荔枝，就成個感覺唔同晒，油膩感大減之餘，仲襯托出煙肉嘅咸香。相比之下豚肉芝士卷就HEAVY咗啲，但好在半溶芝士味道討好，算係加返少少分。
燒鴨舌&雞胸軟骨&雞屁股：鴨舌同雞胸軟骨都係串燒店常客，味道有保證。但雞屁股就真係喺香港十分少見，油香中帶些少羶味幾過癮。雞胸軟骨有些少七味粉喺上邊，辣辣地仲有啲軟骨咬下用黎佐酒就最夾啦，但要留肚落下場，唯有忍忍口。
燒雞翼&鹽燒活鰻魚：呢兩款都係水準之作，雞全翼夠乾身入味。而鰻魚表皮燒得焦香脆口，內裡仲保持結實，魚油香濃。沾上少少柚子胡椒提味，十分配搭。
最後點個燒菠蘿清一清味蕾，表面灑上砂糖再燒製，焦糖香甜再加上酸甜果汁，令串燒嘅上火感覺一掃而空。整體串燒質素都唔錯，下次值得再黎。
