餐牌上面三款任食，其實食最平嗰隻都足夠，我哋有牛肉食就ok，另外其實任食嘅特級牛肉高級極有限，根本冇必要加多六十幾蚊，不如攞嗰啲錢轉個鴛鴦湯底算，咁我哋就要咗秘製麻辣同豬骨湯。
等等，相呢？冇圖學人開post？坦白講我掛住食完全唔記得咗影相，冇計真係太耐冇打過邊爐冇咗件事，好彩同事係個鍾意打卡影相嘅人，所以呢篇食評除咗餐廳門口張相冇一張係我影嘅。
就算冇相我都可以簡單講吓食物質素，事實上我月尾約咗舊同學會再嚟呢道食，詳細就留返下次再寫。
麻辣湯嗌咗中辣不過真係好Q辣，係好香好好味不過我條脷食到一半開始冇感覺，豬骨湯冇咩特別，食食吓啲湯溝埋晒變咗辣豬骨湯又好似唔錯咁。牛有牛味，唔會咬唔開。
醬料配菜都好齊，應該有嘅都有，鍾意送飯嘅朋友可以裝碗飯食，電飯㷛側邊有紫菜飯素，不過認真講句，任食火鍋燒烤嘅飯應該冇一間好食得過牛角。
總結而言，係唔錯嘅，而且好容易會有折扣，所以我都已經約咗人月尾再嚟食，下次應該會記得影相。
