熱點 (Closed)

是日家姐同媽咪放工之後有街去，得番我同啊爸兩個人，所以我哋都決定唔煮飯喇！之前上網見到尖沙嘴有一人一鍋邊爐食，好似幾得意咁，所以就同老豆一齊去試下。呢間一人一鍋叫熱點，入面主打一人一鍋邊爐仔，而招牌就係呢個竹笙椰子海南雞窩，我覺得好似好正，所以決定叫番個。啊爸唔食得辣，所以佢叫咗一個忌廉龍蝦湯窩。每個窩都有配一碗飯，我個竹笙椰子海南雞窩有好多材料，有腐皮、蝦、竹笙、鮮淮山、娃娃菜、雞、馬蹄肉、金菇、貢丸、腸仔、蜂巢豆腐、粟米、粉絲同椰子肉。首先，個湯底好鮮甜，係無味精有好重椰子同雞味，重點係個湯底好清，完全唔油，尤其係個蜂巢豆腐，吸哂所有湯汁，好正！新鮮嘅淮山平時都有食，估唔到出面都食到新鮮淮山，餐廳果然好有誠意。啊爸嗰個忌廉龍蝦湯窩都好足料，佢自己都食唔哂要分啲比我，有黑豚肉、娃娃菜、金菇、粟米、鮮茄、雞蛋、蝦、芝士龍蝦丸、秀珍菇、花枝丸、蜆、貢丸同粉絲，龍蝦湯唔會好鹹，有番茄好開胃，啊爸鍾意食菜，所以佢話呢個邊爐好健康，食多幾次都唔怕！總括黎講，我就覺得一人一個鍋比較衞生，如果任何人唔舒服嘅人去食，都唔怕會傳染比人，所以我大力推薦大家去試下！