新竹園軒

Open Now

Now Closed

今次星期日中午時段過黎，酒樓都好旺場，幾熱鬧，全部用咗圓枱，二至四人嘅圓枱都幾寬敞舒適。食點心就可以自己填好點心紙再交俾樓面，如果想點餐牌入面嘅菜式就揾經理落單。我哋今次就揀咗食點心，出菜幾快，唔洗等太耐！雞腳燉螺頭湯（$30）超足料燉湯，味道鮮甜，滋陰補腎，姐姐仲好窩心甘提我記得趁熱飲！紅燒雞絲翅（$48）濃稠適中，入口順滑，雞湯鮮味香濃，肉質細嫩，淋上少少浙醋，味道更豐富。酸薑皮蛋（$48）唔係度度有得食嘅前菜，溏心皮蛋皮爽流心，加上爽口酸薑同砂糖，醃製過嘅薑唔太辣幾易入口，酸酸甜甜好開胃！招牌蝦餃皇（$42）大大粒蝦餃好飽滿，摺紋精緻，咬落皮夠薄餡夠彈牙，仲好濕潤，超高質！蟹籽燒賣皇（$42）蟹籽多到飛曬出嚟，上枱熱辣辣，蝦肉同豬肉比例適中，肉質彈牙！脆皮金沙蝦腸（$42）油份十足嘅腸粉皮包住蝦春卷，口感豐富，蝦肉餡唔算多但春卷皮保持到脆身！南翔小籠包（$38）手工製小籠皮薄入面湯汁好多又鮮，蘸埋薑絲同黑醋，要趁熱食費事小籠包變硬。蜜汁叉燒包（$30）叉燒包好大件，甜甜嘅肉餡多，外皮鬆軟唔癡牙。最後仲送咗綠豆沙糖水，好滿足！