小食糖 (Closed)

今日行過美麗華商場，左逛右逛都買唔到嘢，反而俾我哋遇到一間懷舊小店，漫畫書、小模型、舊書檯椅、粉筆字……仿如返回細個讀書嗰陣，好多回憶都湧現咗出嚟。唔捨得走，索性喺度花少少錢，買少少嘢食，磨番夠本，打下卡，睇番以前成日睇嗰套 “龍珠”。去櫃檯買咗: 蕃茄牛腱麵、小白龍貓包、台灣啤酒 -- 巨人德式小麥、鮪魚蛋餅。呢度有十幾種台灣啤酒可以選擇，隨意揀咗支 “巨人式小麥” 啤，清清哋幾易入口。睇番個酒樽個label，原來產地係台中，下次去開台中，一定要去實地拜會一下。前菜有白蘿蔔和菜脯，細個時成日食 (那些年係無咩餸食)，家下食番，百般滋味在心頭。蕃茄牛腱麵湯底係超濃蕃茄洋蔥湯，無味精，好味之餘亦好健康。牛腱炆得腍，不過只得兩塊嫌唔夠喉。鮪魚蛋餅蛋味好香，是即煎的，又熱又軟，包住啲吞拿魚，食落味道不錯。小白龍貓包造型cute，裡面有啲椰蓉、梅、花生碎之類的餡料，甜甜地，又幾好食喎。都唔幾得坐咗幾耐，亦未睇晒啲 “龍珠”，要搵日再來再hea 過先得。