新發食堂 (Closed)

喺葵芳返工返左咁耐, 經過呢間食店嘅次數都唔少, 但見到入面地方淺窄, 裝修又舊, 所以每次都令我提唔起勁入內。今日行過時入面剛巧有人開門向我招徠,心諗食得太多其他食肆, 想試下新口味, 於是姑且入去試一試。一坐低就有人送上一杯茶, 叉和匙羮, 跟住問我想食點甚麼, 我望住牆上的餐牌正猶豫之際, 侍應阿姐就介紹食堂的當日午餐的其中一款, 就係糖醋五柳魚飯, 我見到天氣咁熱, 食啲酸酸地嘅食物應該幾開胃, 於是就聽取阿姐嘅意見。一點餐後阿姐就端來一碗霸王花豬骨老火湯, 一喝之下, 發覺好有住家風味, 阿姐話佢地煲嘅湯完全不含味精, 而且豬骨係嚴選, 並唔係cheap嘅豬骨。好快我點嘅飯就送到, 一看賣相不俗, 配菜亦多, 計有三色椒、洋蔥、紅蘿蔔等, 配以色澤鮮艷的甜酸汁, 令人食慾大增。再細味, 魚炸得很香口, 汁亦調較得恰到好處, 想不到在這間小小的店內能食到如此高水準的食物~套餐還配以飲品一杯, 若加$2則可以轉為罐庄汽水, 埋單只是盛惠$29, 已經有一飯、一湯及一罐庄飲品, 的確是物超所值呢~