我地因為得三個人，所以就叫左個Fish and chips, 蟹肉蟹子南瓜汁燴意大利飯 同埋 煙三文魚黑松露海蝦天使麵。最後就叫埋個心太軟做甜品～
炸魚薯條
炸魚同薯條炸得極脆！炸魚魚肉頗滑，而且炸粉唔太多，唔會炸得個脆皮好厚，食落真係外脆內滑！薯條本身就無咩特別，但係佢個黑松露醬真係無懈可擊，真係會令你一食再食，停唔到口！
蟹肉蟹子南瓜汁燴意大利飯
個意大利飯煮得好惹味，每一粒米完全地索哂啲南瓜汁，令到你食落每一啖飯都有濃郁嘅南瓜味係口腔到散發出黎！另外，個飯個面頭有蟹籽同蟹肉，撈勻後，啲蟹籽嘅脆卜卜質感令到你食每一啖飯都有更豐富嘅層次～
煙三文魚黑松露海蝦天使麵
天使麵煮得恰到好處，唔太軟唔太硬，幾有咬口～海蝦都幾大隻，而三文魚食落都好新鮮～唔會有雪味:) 另外，個汁同個意大利飯麵都係好濃郁，完全係落足料！最最最正嘅係黑松露個味香得黎唔會蓋過其他食物嘅味道，呢個值得一讚～
心太軟伴雪糕
心太軟整得好好食，朱古力味幾甜，而且蛋糕同流心嘅部分比例做得好好，唔會太多流心而搞到個蛋糕好薄或者唔會蛋糕厚得濟搞到無咩流心～ 配埋雪糕食，簡直係冰火二重奏～
下次去旺角食飯又多一個選擇！
