才哥蝦麵 (Closed)

大角咀美食林立，今日係奧海城行完街就行過去搵左呢間才哥蝦麵。餐牌非常多選擇，佢個蝦湯麵係標榜無味精，當然要試下。招牌蝦湯麵蝦湯好鮮甜，濃濃既鮮蝦味，連蝦頭都勁好食，配上手打麵，份外夾味，正！招牌去骨雞飯雞肉皮爽肉滑，唔會有雪味，個飯都做得幾好，香而不膩，煮得剛剛好。清燉牛𦟌湯呢個係見隔離台話好好飲所以叫，入面都有好幾塊大牛𦟌，份量足，湯有超濃郁既牛味，鮮甜，鐘意食牛要試下。玻璃魷魚通菜一放低好香，個魷魚醬汁好惹味，魷魚爽脆，份量都不少。加7蚊叫左蜜糖吉仔水同西洋菜蜜蜜糖吉仔水對我黎講酸左d，但友人就話剛剛好。西洋菜蜜好好飲，比出面飲過既更有味最後蝦湯都比我飲曬，好好飲，亦無口渴感覺，真材實料！