益昌小食店

今日難得見天氣咁好，好即興咁約B君一齊去大澳hea遊一下。去大澳一日遊，買蝦醬可以話係好多遊客嘅指定動作。我亦都唔例外。出發之前已經收到呀媽order 要買蝦醬。不過黎過大澳嘅朋友都會知道，大大小小嘅蝦醬檔海味檔可以話有幾十間，真係好難揀。

係條小巷度隨意行下嘅時候，見倒呢間昌益小食店。呢間係海味小食一條龍嘅老店，一間鋪賣海味蝦醬，對面鋪係小食店，用自家製醬汁整小食，新鮮感十足！於是B君提議試下呢間，如果好味，可以順便買埋呢度出嘅蝦醬。

店內環境一般，牆上menu 上面嘅價錢有幾層 label 貼係上面，應該生意唔錯不斷加價...

雖然小食價錢偏貴，不過味道真係好正好有驚喜。驚喜唔係食物本身，而係d醬！

總共叫左三個小食！醬汁多多味道濃郁！

首先係呢碟蝦醬魷魚，呢度用嘅自家製熟蝦醬。味道無傳統蝦醬咁咸，而且醬嘅分量好多，味道鮮美濃郁，帶起左本身普普通通嘅魷魚嘅鮮味！

$18 - 好味指數 8/10

跟住係呢碟XO醬燒賣，燒賣本身口感好淋，估計翻蒸左好多次，但係個XO醬可以話起倒起死回生嘅作用！呢$22蚊買嘅並唔係燒賣而係d XO 醬。呢個醬並無出面市面果d XO 醬咁辣，不過就多左一分蝦米嘅鮮味，令本身可以話係難食嘅燒賣加爆分！

1

$22 - 好味指數 6/10

最後係呢碟蜆介醬生菜，賣點依然係個醬！呢個蜆介醬同普通點鯪魚球嘅醬好唔同。呢個醬無咁咸之餘，仲有d蜆介彈牙口感，感覺有少少似食緊蠔屎。生菜本身亦新鮮，醬同菜非常配合，好有驚喜！

1

$18 - 好味指數 8/10

最後未夠喉，叫多個凍豆腐花。豆花夠滑，不過味道頗淡，無店內其他小食咁有驚喜，不過價錢夠平。

$10 - 好味指數 7/10

最後，食完嘴lam lam 之後，不忘去對面買翻幾瓶醬翻屋企孝敬呀媽 XD。

$39 - 好味指數 8/10 - 其他醬價錢較貴 ($40-60不等) 蝦醬相對較抵食