大光燈麵食巷仔雲吞麵 (Closed)

好多人都話沾仔記或者劉森記嘅雲吞麵好食，前者雲吞雖然大粒但麵質麻麻，後者麵質彈牙無鹼水味，可惜雲吞未合我心意，妹仔大過主人婆，真係食水餃好過。所以選擇要取個平衡，曲街盡頭嘅大光燈就合我心水。麵未到前，檯面嘅酸蘿蔔青瓜一定會成為我頭號攻擊目標，同劉森記水記永華一樣自家醃製，酸蘿蔔夠爽脆，極醒胃，質素方面我反而最愛係水記。麵身鹼水味道極微，咬落去彈牙有蛋香，比起劉森記竹昇麵，絕對唔會輸蝕。雲吞細細粒，有如散尾金魚，外型上唔錯，雲吞皮夠薄夠滑，豬肉蝦肉比例剛好，值得一讚係蝦肉鮮味爽口，豬肉餡香跟清甜湯底好配合，呢份散尾細蓉只賣廿元，抵食至極。除左細蓉，大光燈牛腩麵聽聞評價唔錯，點都試一碗。麵質湯底當然同雲吞麵一樣，但呢度無再細分清湯腩，坑腩，爽腩定係崩沙腩，賣嘅只係最普通牛腩瘦肉部份，肉質夠腍夠鬆化，筋位部份食落又唔會太韌，總算可以一試。當然，呢碗牛腩麵質素跟九記，華姐相比，又係一個街頭街尾。我每次食雲吞麵，都會要罐可樂送下口先夠滿足。但黎到大光燈，我又偏偏中意飲黑色零糖可樂，莫非呢條曲街上，要飲「靈堂」可樂應景？真係大吉利是...