MiMiDi (Closed)

好多幕前嘅藝人都會開餐廳，但唔係太貴就係唔好食。而小儀呢間麵麵店主打平民車仔麵，加上小儀仲係美女廚神，所以食物質素都相當有保證（雖然比初初開店時都稍為退步），今次就去到灣仔分店，同A姐食碗車仔麵，滿足一吓思鄉心情，再上機出發去旅行啦！

M佬之選：牛腩+牛柏葉+咖哩魷魚+豬皮+油麵
牛腩炆得夠腍、牛柏葉掛上咖哩汁、魷魚份量多、而索晒辣汁嘅豬皮好入味。而嚟到食麵麵店當然要加上佢嘅辣菜脯，令到麵同湯底辣得更有層次。

A姐之選：韭菜餃+酸齋+唐生菜+麻辣蓮藕+魚肉春卷+幼麵
酸齋同麻辣蓮藕都係麵麵店嘅名物！首先酸齋表面係脆卜卜，而入面就索滿辣湯，好惹味呀！而麻辣蓮藕夠爽脆，配上紅椒、辣油、花椒等，麻辣感覺慢慢滲出嚟，好刺激呀。而韭菜餃估唔到咁多韭菜，好足料呀！