27-10-2010
又同朋友食即興 dinner, 是日唔知點解想食「有蝦膠的炸嘢」, 朋友就提議到天后食泰國 / 越南嘢, 起碼有炸蝦餅嘛
而云云多間中入了呢間, 就完全因為佢門口貼了張紙話供應「蟹膏鮮蝦扎肉湯檬」.
百花釀蟹箝: 本來想叫炸蝦餅, 但見呢度竟然供應炸蟹箝, 貪玩叫了嚟試試
一客 3 隻, 炸得透, 食落當然熱辣辣, 夠脆又唔算油, 蝦膠味道亦幾鮮, 質地彈口, 蘸點泰式酸甜雞醬, 都幾好食; 蟹肉份量就當然較少, 起碼叫「有」吧 -- 講真, 30 幾蚊一碟, 仲想點?
蟹膏鮮蝦扎肉湯檬: 乜咁大碗
紅 bok bok 湯底由蕃茄及蝦醬煲成, 質地濃厚, 飲落帶蕃茄的酸酸甜甜, 又有蝦醬及蟹膏的鹹鮮, 正 :) 不過「檬粉」就竟然係實心白色, 質地帶點 Q, 似米線多 d 喎 , 而且索湯後比金邊粉 / 河粉更飽滯, 最後當時嚴重食唔晒; 幾隻蝦已「砍頭」, 食落算爽身, 但無味的 ; 其他配料仲有扎肉及混了蟹膏 (醬?) 的肉碎, 扎肉實實的, 味道普通, 不過既然主角係湯底, 是但啦.
朋友又食烤豬頸肉飯... 試了少少豬頸肉覺得太軟撻撻了, 感覺亦肥膩, 唔太喜歡.
飲品叫了龍眼肉冰, 夠凍, 唔太甜,「圓肉」的味道好重, 收貨的.
食物中規中矩, 環境就係「速食」/ 街坊格局, 衛生一般, 阿姐們態度亦一般, 食完快閃好了.
連朋友的熱奶茶, 埋單每人約 $85, 一試無妨, 我就應該唔會再試了.
