SOFFEE (T.O.P This is Our Place) (Closed)

每次經過見到呢間餐廳，望到啲蛋糕都會心心眼好想食款款都好靚。今日專登出嚟High Tea 打下卡基於款款都咁靚．樣樣都想試最後揀咗三款甜品「Rose」粉紅色玫瑰花嘅造型，啖啖荔枝同玫瑰嘅清香，唔太甜，裡面仲有粒粒蘋果肉。「Cactus」顏色同賣相都靚到唔捨得食，日本宇治抺茶味超濃郁，又唔會太苦，裡面仲有白色嘅麻薯，口感軟軟糯糯。「Sun Flower」我係榴槤控，見到有榴槤嘅甜品一定唔會錯過。除咗賣相靚之外，榴槤嘅味道非常濃郁。口感又香又滑，好Creamy。「澳洲牛油果榴槤奶昔」牛油果香，完全無被榴槤味掩蓋，味道幾清新，食完甜品再飲埋呢杯奶昔，超級滿足。下次可以留肚，再嚟試下其他主食同沙律。