福來棧茶餐廳 (Closed)

好耐無嚟呢度食，咁啱今日有事到旺角，順便上去食個lunch。今日幫襯咗福來棧(加州陽光)。餐廳由一對年長夫婦主理，男人落單、女人負責煮。(真正嘅男主外、女主內)嘅蕃茄燴咸牛脷意粉(亦可以免費轉飯)，連西湯(忌廉湯/羅宋湯)及熱飲都只係賣$45(我轉凍飲+$2)，呢個價錢真係抵到爛，仲要係旺角。意粉份量都算多、牛脷你更加估唔老細咁闊佬畀6片(唔係薄切，而係每塊都有半cm厚)兼且好冧好入味。最意想不到係伴碟菜唔係白烚唔係得一樣菜，而係蒜蓉炒雜菜(鮮冬菇切片、紅蘿蔔條同椰菜)。雖然我對蒜蓉嘅喜好一般，但我不得不承認蒜蓉炒比白烚優勝。忌廉湯味道一般，有啲杰身，但好多蜆肉。凍檸茶少冰佢真係同你走冰咁滯，因為我只係唔想飲熱嘢。