家後

Open Now

Now Closed

聽聞深水埗有間出名嘅街坊餃子店，餃子一流，一於同家姐去試試。 鋪內位置唔算大，簡簡單單，幾張細枱，坐得都舒服嘅。煎餃套餐係必點，事關老闆做到即叫即煎，非常有心。 洋蔥豬肉餃子，紫洋蔥配新鮮豬肉，真係冇得輸，入口充滿洋蔥及豬肉鮮味，多汁又juicy，熱辣辣，停不了口。另一款雲耳椰菜豬肉餃子，材料豐富，隻隻飽滿，爽口又脆身，百吃不厭。配有日式住家牛蒡飯糰，新鮮健康又有益，充滿日式風味，跟餐仲有一杯飲品，凍鴛鴦回味無窮。店內有車仔麵餐供應，配料有數十款之多，仲可以揀牛骨或豬骨湯底，叫咗豬紅、牛腩及鮮蝦雲吞米線試吓。 每款份量適中，豬紅有鮮味，牛腩炆得入味，雲吞內有鮮蝦及香甜豬肉，味道可口，湯底亦夠清甜，米線就略嫌煮得有點過稔。 下次可以試吓菠菜麵，應該幾好味。我地仲叫咗個麻辣豬肚，豬肚夠稔身，麻辣夠惹味，作為小食，非常討好。另外一款酥脆炸肉丸，做到酥脆甘香，但味道可以有肉味及有咬口，便更出色。仲有必食嘅日式手作芝士蛋糕，原來老闆太太係日本人，出品當然夠地道，蛋糕入口，立即感覺到嗰種超幼滑細緻質地，creamy中滲透出濃香芝士味，一試難忘，果然不負衆望。