深夜食堂 (Closed)

嚟到厚福街藍馬商業大廈嘅居酒屋,近月改咗名做深夜食堂,店名少不免會令人聯想起一個日本嘅知名漫畫.佢哋嘅戶外座可以睇到厚福街一帶嘅繁華街景,晌呢種唔冷唔熱,氣溫啱啱好嘅日子前嚟,都算舒適.餐廳有提供燒物,炸物同其他日菜,雖然前身已經開咗幾年,但呢晚我哋係第一次嚟試.生燒牛脷芯切得厚薄適中,口感爽彈.一口安格斯油光閃閃肉質軟嫩,簡單咁用鹽同黑椒調味已經足夠.我以為豚肉露筍卷係一口氣包幾條露筍嗰種,實際係每條露筍都用咗豚肉片捲住,質感爽脆,醬汁又夠甜蜜,一口接一口,食得幾方便.煙肉荔枝卷外層嘅煙肉有油香,入面包住荔枝可以解膩.原隻烤菇燒得唔乾身,上面灑咗木魚碎,熱力令佢哋輕輕擺動,幾得意.川式茄子上面有蒜蓉同辣椒粉,食起嚟甜甜辣辣.不過如果再濕啲啲就更好.芝麻雞翼一碟有四隻,炸皮夠薄同香脆,調味濃郁.芝士野菌玉子燒上面灑咗番茄醬同紫菜碎.拎到嚟之後店員先將佢切開,玉子煎得滑溜,中間嘅芝士濃稠流心.蒲燒鰻魚飯嘅鰻魚細長,雖然唔算肥美,但都幾軟綿鬆化.米飯咬起嚟煙煙韌韌,用嚟撈蒲燒汁食都幾惹味.第一次試呢間,感覺唔錯.唯一缺點係室內冷氣好勁,食物拎嚟冇耐已經變凍咗.