Lamcombe Seafood Restaurant (Closed)

今日係男朋友既生日，經過尋日既慶祝活動之後，大家都懷著一個開心既心情入嚟南丫島過一個平靜既正日生日，本身打算去大興食，見佢食評好好但可惜嚟到無開，聽街坊講佢地已經係半退休，唔接新客了！咁唯有是但搵間去試下啦！誤打誤撞之下，我地就嚟咗呢間南江！

可能因為平日既關係，呢度都無乜人，有既都係老闆娘既朋友....我地今晚主打想食蟹，但又怕套餐既蟹太細隻，所以問咗老闆娘可唔可以加錢轉大隻蟹，最後加咗$150 將蟹加大，我地點咗椒鹽瀨尿蝦、避風塘炒蟹、辣酒煮花螺、豉汁蒸魚同埋燒乳鴿，D餸一碟一碟咁送嚟我地就開始累積不滿既情緒了！

唔夠脆，BB鴿咁既SIZE但聲稱係大鴿 -.-

燒乳鴿 - 佢有兩個價錢，BB鴿 $45，大鴿 $60，我地之前去大圍都係食BB鴿，所以今次就叫咗大鴿嚟食，但點知嚟到個SIZE係等於大圍既BB鴿，皮唔夠脆，一般

味道一般，有一兩隻肉梅

椒鹽瀨尿蝦 - 味道一般，有一兩隻肉梅，但尚可接受

蒸魚蒸得好老，一般茶餐廳都比佢好

豉汁蒸魚 - 條魚蒸得好老，對於一間專門食海鮮既酒家嚟講真係唔可以接受

完全唔辣，勁細碟

辣酒煮花螺 - 無乜味，完全唔辣，太細碟，只得10粒好似手指頭咁大既花螺

味道尚可接受，但老闆娘唔老實，加錢唔加大，激氣之作

避風塘炒蟹 - 加咗 $150 都係比咗細 SIZE我，完全唔係之前佢拎出嚟嗰隻咁大，仲同我講話咩海鮮都會縮水，蒸魚都會縮咁話 真係咁都講得出!!!!!! 我都唔想再同佢講野，再講落去真係火都嚟！

最後見佢碟碟都細碟，我地叫多咗碟椒鹽鮮魷食，呢味係哥哥仔推介既，成餐飯佢都招呼週到，所以信佢推介，佢果然無介紹錯，呢味餸真係成餐飯既精髓！GOOD!!! (不過可惜食到呢個時候已經成肚氣，唔記得咗影相:()

整體嚟講，呢度既食物真係唔值呢個價錢 (呢餐盛惠 $776)，水準低於茶餐廳都不在話下，最唔鐘意就係做生意唔老實，加錢唔緊要，最緊要係要老老實實講好咗比咩人就比咩人，做生意真係唔係咁做呢！其實呢個價錢真係可以食到好多好野了....今次呢餐真係令我對南丫島海鮮大打折扣，短期內都真係怕怕呢！