上戶酒場 (Closed)

探索屯馬線第二集，發現呢邊有唔少居酒屋，同呢個隱世嘅神秘地帶好夾，有種孤獨美食家走入橫街窄巷嘅代入感。野菜條伴鯷魚醬作為前菜交足功課，鯷魚醬全程座熱，暖暖地好有魚味，為野菜條生色不少。 尤其鍾意沙葛條好多汁好清甜，好似食緊梨咁爽脆。刺身盛合 ($338)作為唔鍾意白身魚嘅代表，不得不讚眼前係我見過最有光澤最新鮮嘅油甘魚，入口魚味好濃完全唔腥。 海膽亦都係超水準發揮，就係甜到連一細塊都㗳得出個甜味，雖然好有心機地配左紫菜，但空口食先唔會嘥料。鐵板牛油刀貝 ($128)曾經食過海鮮蒸鍋對刀貝一試難忘，本來以為清蒸以外嘅煮法會徙咗清甜嘅刀貝，但原來加牛油汁會更加香，完全唔會油膩，連汁都飲埋。 刀貝脹卜卜，爽口彈牙夠鮮甜。雞翼串 ($28)雞翼已經開左邊，令火力更加平均。 除咗香噴噴之外，真係一路食一路滲出肉汁，呢個手工其實賣貴一倍都唔過份。煙燻五重芝士pizza ($108)同樣用返呢度最耍家嘅炭爐煮法，好特別地個Pizza底真係食到炭燒香味。 食到尾依然有拉絲效果，少有地真係芝士有芝士味，唔會太鹹或者膩。