呢一間位於朗屏邨嘅小食店，我呢種咁岩無飯食嘅孤獨精最適合不過喇。唔好以為所有串燒店下下都要幾百蚊埋單，其實要平食，呢到40蚊都可以有找兼飽飽添咖！
小店長期都有套餐供應，通常都係兩款小食加一碗拉麵送汽水，大概40至60蚊；又話40蚊有找？咁就要有策略咁去食喇！
餐牌內分別有$18大/$12細拉麵選擇，我兩個尺寸都食過，大嘅份量係細嘅Double，小胃女生可以柯打碗細再加兩串小食，夠哂飽；然而怕唔夠就叫大碗就實無死。
如是者，我呢啲頹爆少女當然隨意柯打少少就食完個晚餐，於是就一碗細拉麵、芝士腸、一口蕃薯再加多罐可樂解解渴，就係咁簡單，夠平夠飽！
1
不過都題外話講番，個人覺得大細碗拉麵嘅份量好似有啲唔穩定，感覺上次細碗嘅麵比較多，唔夠飽真係唯有叫多串串燒。
至於曾經喜歡柯打嘅蒜蓉茄子，最近比較遜色，初期開店時茄子用嘅蒜蓉量係相當豪邁，蒜蓉同牛油平均分佈係整條茄子，十分入味！可惜最近調味料一次比一次少，取而代之係增加咗好多味粉，但味道始終不及從前，希望小店會有所改善啦。
