一入到感覺好似去咗日本，因為細細間，可以同老闆店員嗰啲吹水，我見有兩夫婦應該成日嚟，所以佢哋就係咁吹水。星期六晚，得好少客，我初初都驚有啲伏。可能因為冇乜人，服務態度真係幾好，我book咗7點，打去話會遲，佢叫我唔使急。
重點都係啲嘢食，佢有啲刺身係寫喺塊板度，係啲最新鮮嘅限量choice，雖然選擇唔多，我叫咗原條活金頭鯛 $298，切出嚟份量都幾多，我好少食過咁新鮮，勁爽口。另外加咗一對北寄貝同帆立貝，都好好食～
熟食叫咗枝豆（係我最鍾意暖嘅），仲有雞皮、雞橫隔膜、牛舌芯、青椒仔（辣得嚟好爽）、淮山，全部都好好食。
叫咗Suntory黑啤同白啤，叫完先知原來買一送一，即係free咗一杯。
埋單唔使$700（ 兩個人），仲食到好飽，因為openrice訂有 85折。佢收貴啲我都會去囉。我去過唔少居酒屋，呢間真係一間好好嘅餐廳，真心希望佢做得住。缺點係啲嘢食款式唔可以話好多，不過明白小店都唔可能儲存太多貨，如果唔係都唔可能咁新鮮。
我好少寫食評係讚嘅，因為真係好想多啲人去，唔想佢執。
