泰鳩 (Closed)

由DeeGor、Lokman同Alton開嘅泰國餐廳，位於旺角譽發大廈，油麻地地鐵站行幾分鐘就到，夠晒方便。 環境唔錯，有室內同室外座位。 仲係寵物友善餐廳，見到好多客人都帶住自己寵物嚟食飯，特別溫馨。先嚟兩杯飲品，【翠綠湖】陣陣斑蘭椰香味。【芒芒雪沙】芒果味十足透心涼，感覺置身泰國嘅陽光與海灘渡假。頭盤【黃金蝦餅4件】第一次見咁大咁厚嘅蝦餅，啱啱炸出嚟熱辣辣，蝦肉爽彈，蘸泰式酸辣汁食，風味十足。 主菜【泰式明爐魚（鱸魚）】魚肉新鮮嫩滑，上面嘅香葉香茅帶點清新香味，湯汁酸酸甜甜幾開胃，如果味道濃返少少，個爐再大火啲熱啲就完美。【慢煮牛肋骨】好驚喜！超推介！十分大堆頭，牛肋骨已經薄切好，慢煮出嚟口感軟腍，肉同油脂比例啱啱好，食落肉香油香兼備。我哋加咗薄餅，揀青咖哩汁，薄餅好大塊，食完超級飽~最後點少得甜品，泰菜必食甜品【芒果糯米飯】。淋咗椰汁嘅黑白糯米飯，口感軟糯，加埋甜入心嘅鮮芒果，大滿足~ 餐廳仲提供$69起嘅午巿套餐，好抵食咁，下次試吓先~