大都烤鴨 (Closed)

今日約左舊同學聚一聚，大家都話想食片皮鴨，最後就決定揀左呢間位於尖沙咀K11入面既大都烤鴨喇。環境方面，座位闊落，坐得舒服，唔會話逼住逼住咁，所以呢餐飯都食得好舒適。服務態度方面，等位黎講都算快，因為都比較多人等，但我地都係大約半個鐘就入到去。服務員既態度非常好，上菜速度好快，見枱面唔夠位會幫我地執走晒食完既碟。食物方面，咁我地一行4人就叫左4人晚市套餐，食物既賣相都好靚，當然味道都唔差。值得一讚既係呢餐飯既主角片皮鴨。鴨皮脆薄，鴨肉都好嫩滑，食落又唔會好油膩，係必食既一道菜。唯一美中不足既係份量有啲少，大家都食唔夠喉。價錢方面，晚市黎講呢間餐廳既價錢合理，咁既價錢食到咁高質素既中菜就真係無得頂。