想免茶位費好簡單，只需每人order一杯茶飲就可以，咁就梗係order啦！呢度嘅茶飲款式好多，唔單止味道唔錯，仲好打卡！
手打老鹽話梅檸檬綠茶($39)
外形好fancy，擺咗一個噴煙嘅茶壺喺上面，效果一流！綠茶茶底香醇，話梅酸酸甜甜，都幾解膩；
爆珠馬蹄椰子水（$29）
推薦！入面有好多爆珠，一咬就噴出椰子水，清新天然，加埋粒粒馬蹄，口感豐富！
潮汕滷水炸乳鴿($49／隻)
乳鴿用陳廿年滷水膽滷製，皮炸至微微香脆，肉質嫩滑，滷水香料入味又唔會太鹹，都唔錯。
滷水拼盤($99)
滷水滷得好入味，特別係豆腐，吸收滷水嘅香料味，墨魚都好爽口彈牙！
炸蠔餅($89)
好大份，蠔餅炸得酥脆，如果蠔肉多d就更好啦！
百花紫菜酥($89)
爽彈嘅蝦膠墨魚膠粟米餅將其中一面鋪上紫菜，再煎炸至脆卜卜，雙重口感又充滿鮮味，推薦！
呢度都有好多款創意點心，好多都好吸引！
天鵝酥($59)
天鵝酥造型維肖維妙，鬆化嘅酥皮原來包住真．汕頭鹵水鵝肉，好特別！值得一試！
鮮荔枝球($39)
外表如荔枝般，色澤艷麗，玩味十足。煙煙靱靱嘅外皮包住芝士蝦粒，不過蝦粒偏小，如果大粒d食落會更有口感！
海鮮紫菜炒飯($89)
性價比好高，海鮮份量慷慨，炒飯炒至粒粒分明，好有鑊氣！
桂花黑醋海鱸魚($189)
原條炸魚上，餐廳好細心地起晒肉，食起來唔怕論盡。鱸魚外脆內嫩，黑醋汁調味剛好，有驚喜！
落湯錢($39)
難得見到有潮汕甜品－－落湯錢，當然唔可以錯過！好少地方有得食呢！落湯錢口感香糯黏滑，灑上芝麻、花生碎及五仁粉，口感好有層次！
