爆丼丼 (Closed)

早排父親節去荃灣同家人慶祝，已經留意到哩間爆丼丼，於是乎襯得閒去幫襯吓。想去幫襯，當然有原因啦，因為見到佢店入面d海報超吸引，碗飯上面鋪滿海膽同刺身架，近排食咗幾間唔掂嘅餐廳，希望今晚食翻餐好啦！極上生魚丼，四重爆丼，蟹籽沙律同鹽燒三文魚頭各一客，開餐啦！生魚丼嘅三文魚腩唔係薄切係厚切，即使赤蝦刺身，帆立貝等等，都係足份量無偷工減料，四重爆丼上鋪滿海膽，帆立貝，三文魚籽，拖羅碎放最頂，海膽，三文魚籽同米飯一齊放入口，美味充滿成個口腔，超正超美味！其實單單睇兩碗飯，已經係視覺享受。近年食蟹籽沙律，發覺好多餐廳提供嘅蟹籽份量都少咗，但爆丼丼無哩個問題，蟹籽份量足夠。每次食三文魚頭，都唔會點失望，哩次都唔例外，望上去燒得夠燶，我中意燒得燶d，食上去香脆d，魚頭亦燒得夠肉質嫩滑，唔錯。我影完相之後，即刻 send 俾日本大阪朋友，問佢日本有無哩類食法，佢話日本無哩種架，佢睇到都話正，羨慕死佢！