好多人都叫車仔麵做拿渣麵，但係臨記我只係感受到佢係一間己有規模同系統嘅車仔麵店，搵左位之後可以排隊買嘢食，跟住等叫號碼取餐，負責煮食嘅員工全部口罩，手套，以及頭套， 非常着重衛生
餐廳設有自助調味區
總共叫左2個車仔麵，臨記既特別之處就係湯底選擇多，有傳統湯，咖哩湯，麻辣湯同蕃茄湯，傳統湯底免費，其他要+$1
媽媽話要食傳統湯，即係豬骨湯
味道都唔錯，湯底都幾香，唔會得個咸字
餸菜叫咗陳皮魚蛋，雲耳，糖心蛋，豬皮同魚片頭，糖心蛋整得好好食，做到日本糖心蛋嘅效果，豬皮炆得好腍，吸收晒湯嘅精華都幾好食
另外一碗叫左蕃茄湯底，餸菜我只係叫咗炆小花菇脆味豚肉，因為我另外仲叫咗一個雞翼，所以就唔使叫太多餸
平時係出面食嘅蕃茄湯底都會比較深色同甜，因為落咗茄膏去煮，但臨記嘅蕃茄湯底係食到好清香嘅蕃茄味，仲帶咗蕃茄原本有嘅甜酸味，唔似茄膏得個甜字
我叫呢兩個餸都10分出色，小花菇好香冬菇味，同埋炆得好入味！脆豚肉係類似豬頸肉嘅味道，好爽， 而且個味調得好好，食到停唔到口， 而且份量有成塊豬扒咁大， 必定要試
油炸鬼雞翼$19係另一樣我覺得必點嘅食品，外層嘅油炸鬼皮好鬆脆，裏面嘅雞翼唔會炸到乾哂，調味做得好好，咁創新嘅食品真係一定要試
另外叫咗車仔麵可以以優惠價加配飲品，真係好抵食，真心覺得呢一間比起米之蓮嘅車仔麵更好食，希望佢可以開多啲分店❤️
