関東酒場 (Closed)

去完行街突然間好想食串燒飲清酒，朋友介紹呢一間位於大角咀嘅關東酒場六點入座已經開始好多人，睇嚟真係冇介紹錯！一入門口一大個酒櫃，面前仲有一個關東煮檔，好有feel。一坐低服務員先放低一杯黃色雞湯，非常濃郁好好味！ 然後介紹我哋清酒放題，最後我哋揀咗松放題，套餐包括有關東煮同埋小食，仲可以加錢有串燒套餐！清酒方面服務員攞咗一盤酒杯俾我哋揀，而且可以根據你嘅喜好服務員會幫你挑選適合你嘅清酒，我哋就比較鍾意飲甘口既，飲咗唔同嘅味道有薄身有厚身，仲有米香同果香。關東煮的確大大份，兩個人已經可以叫六款唔同嘅關東煮，每一樣沾上關東煮嘅汁非常好味！芥末八爪魚連埋紫菜上，唔會太攻鼻，口感豐富！呢一個砂肝10分推介，辣辣地少少爽口送酒一流！真係無諗過咁出色！