永樂園餐廳

Open Now

Now Closed

眼看好普通的地下餐廳仔，menu各樣野都好普通，但食落就知道不平凡。羅宋湯係偏甜的，但甜得黎好有自己風格。我一向都係羅宋湯fans，好開心又多一個飲羅宋湯的好地方。足料的湯渣令我好滿足！圖中大大條的西芹喺被煲湯後依然略帶少少菜青味，同湯底的味非常配合。牛肉味不濃，反之其他的蔬菜都保持住自己本身的鮮味，好味到再飲多幾碗都得！一碟碟頭飯、一個餐湯同一杯野飲，可以有咩驚喜呢？粟米火腿肉粒飯一個聽落完冇特別既名居然隱藏唔少心機。一上枱，粒粒肉粒都切得好工整、好靚。而火腿絕對唔係好薄的火腿絲，而係充滿質感的火腿扒粒。火腿扒粒同肉粒肉質唔同，前者較為堅實有彈性；後者則更淋滑多汁，兩者交疊加上爽口的粟米粒。百感交集，好味！個汁都唔少野，半透明偏白。唔會過份sticky好似落左好多生粉咁，只輕輕的一層sauce 蓋喺肉粒、火腿同粟米粒面。師傅勁！個汁打得好！紅豆冰又係好正呀，奶同豆都各自好香，紅豆粒粒大而且煮得淋。如果可以再甜啲啲就冇得輸啦。